Маризь Кемаль - Тондеть моратано, Чипаз
текст песни

Инешкипазонть сувтемезэ
Сувтни велькссэнек ловонь почт,
Вельти Мастораванть мештензэ
Ды ванськавты миненек кошт.

Мороюткось:

Телень шкане, кельме шкане
Тондеть моратано, Чипаз!
Тундонь шкане, мазый шкане
Чопода весь ули изнязь!

Васолдо, менелень томбальде
Инешкипазось ялтке кучсь,
Ды эйзюрговонь сиянь гайтте
Кежей якшамонь виесь пужсь.

Мороюткось:

Тундонь шкане, мазый шкане
Тондеть моратано, Чипаз!
Тонь валдо виеть, лембеть ало
Чопода весь ули изнязь!


Лымбить сюротне паксянь келес,
Уи менельга Пазонь венч.
Шожда лексемс, кепети мелесь,
Зярдо а ливтни равжо кренч.

Мороюткось:

Кизэнь шкане, касы шкане
Тондеть моратано, Чипаз!
Тон казят тенек зняро маней
Чопода весь ули изнязь!

Каргонь велетне содазь кива
Ливтить, маряви сёлмонь увт.
Норов ды Комля пидесть пия:
Ломанень ёнксот илить стувт!

Мороюткось:

Сёксень шкане, сюпав шкане
Тондеть моратано, Чипаз!
Тонеть кандтано минь сюкпрянок.
Чопода весь ули изнязь!

Парось, берянесь мельга-мельга
Икельстязь чиить ды сасыть.
Минь покштянь покштянок икельга
Стятано, зярдо шканок сы.

Мороюткось:

Тунда, кизна, сёксня, тельня
Тондеть моратано, Чипаз!
Эрзянь ойменть иляк кельмевть! –
Чопода весь ули изнязь!