Альберт Узденов - Сегиз жаш
текст песни

муз. и сл. Альберта Узденова

Ариу, сени тилейдиле сегиз джаш,
Джокъ аланы ичлеринде менден джаш.
Бир билгичге салдыргъанма бюгюн таш,
"Сенсе,-дейди,-барысындан эсе баш!"

Ол айтыудан - бурма чачым, акъ къаным,
Субай саным, акъ джюрегим, акъ джаным!...
Джангыз менме тогъузунчу, джангыз мен -
Хар неси да тамам сеннге келишген!

Припев:
Шеке эсе - къарт теке,
Зеке эсе - къызтеке,
Даулет эсе,бек хаулед,
Келемет а - шимирбет,
Мухтар эсе - юйю тар,
Махар эсе - бек мухар,
Тауукъ урлайд Гомалай,
Кендир тартад Домалай!

Чырт къолунгу сууукъ суугъа тийдиртмем,
Соболь тондан учуз кийим кийдиртмем,
Бармагъынга накъут-налмаз джюзюкден
Ауур затны кёлтюртмезме, ийнан сен!

Эки къатлы юй саллыкъма шахарда,
Солурбуз Тебердиде, Махарда,...
Къыза кетсек,тенгиз таба кетербиз,
Сегиз джашха сегиз ачыу этербиз!

Припев.

Мерседесге онг джаныма олтуртуб,
Джюрегинги къууанч джырдан толтуртуб,
Терезеден ургъан салкъын аязчыкъ,
Джаягъынгы сылагъанда, мен азчыкъ

Ревноватчыкъ этерикме, бил аны,
Тюгел тыгъыб иймесем да къаманы.
Аны сезиб аяз къолун да алмаз!
Сегиз джашдан бири аяз болалмаз!

Припев.

Тамам къызсакъ, Берлин таба кетербиз,
Рим! Париж! - дей, Лондоннга да ётербиз,
Океанда кемеде той этербиз,
Андан ары Нью-Йоркга джетербиз!

Вашингтонда Акъ юйге да къайтырбыз,
Президентге безий, хапар айтырбыз,
Сен ортада, суратха да тюшербиз,
Сегиз джашха сегиз сурат иербиз!

Припев.

Къысха-къысха сеннге къарай сюйюне,
Биз къайтырбыз ёз атамы юйюне,
Сен кёрюрсе юйюн бир тюз таулуну,
"Махтаннганы не эд, - дерсе сен, - муну"?!

Сен унасанг анда къалыб кетерге,
Джашауунгу мени бла бир этерге,
Сюе эдим. Къалмай эсенг, тийсин таш!
Майна, сени сакълайдыла сегиз джаш!

Припев.