Руслан Тараховский - Дорообо дойдум
текст песни

Халлаан хахсайан
Хаһыҥ хаарыйан
Силлиэ силэйэн
Сиик иҥэн
Ахсааннаах сылларга аньыылааҕынан ааҕыллан
Атын халлаан анныгар
Самыырга баттатан
Ардахха сытыйан
Араас аймахтарга айаннаан сырыттым
Сэмэ-суҥха ситэн
Аньыы-буруй боруостанан
Сэбирдэх курдук чэпчээн
Куорсун курдук кууран
Эҕэрдэлээх ийэ буорбар эйиэхэ
Элэйэн-сылайан эргийэн кэллим
Эн сайаҕас салгыныҥ
Арыынан аҥкылыйан
Сүрэхпин ньүөлүттэ
Күлүмүрдэс күнүҥ
Көймөстүбүт көхсүбүн
Көтүрү көрөн
Көндүөрүтэн көччүттэ
“Уруттаан уҥуоҕурбут
Уорбаҕа угуллубут
Уолҕамчы санаалаах уолчааным
Сордоох!
Тугу туһалаары, туһанаары
Сутаабыт сур бөрөлүү
Анаҕаскын атыгыратан
Кэнтиги кэһэн кэбэлийэн кэллиҥ
киэр буол”, - диэн
Сириҥ симэҕин, сиэдэрэй сибэккитин
Сытырҕаан-сыллаан испэр иҥэрэн
Итирдим, ирдим, чэбдигирдим
“Уруттаан уҥуоҕурбут
Уорбаҕа угуллубут
Уолҕамчы санаалаах уолчааным
Сордоох!
Тугу туһалаары, туһанаары
Сутаабыт сур бөрөлүү
Анаҕаскын атыгыратан
Кэнтиги кэһэн кэбэлийэн кэллиҥ
киэр буол”, - диэн
Кэннигинэн эргийэн, киэр хайыһан
Сытыы тыалгынан чыпчаххайдаан
Хаардаах хаһыҥҥынан хаарыйан
Тумул сир токур тиитинии
Тоһутар тоҥ толкуйданыма
Тоҥхойуулаах дорообо буоллун!