Тенгиз Габаев - Дин къарындашла
текст песни

стихи Кязима Мечиева (оригинальный текст)

Къуранны алабыз къолубузгъа,
Аллах деп, чыгъабыз жолубузгъа,
Къарайбыз онгубузгъа, солубузгъа, -
Дин къарындашлабыз биз.

Уллу Аллах бир кюн жаратханды
Жанланы, тиллени танытханды,
Билебиз, къуранда жазылгъанды, -
Дин къарындашлабыз биз.

Хакъ, жанны бары бир кюн туугъанды,
Бир жазыу, бир ёмюр салыннганды,
шукур, мажюсюлюк къалыннганды, -
Дин къарындашлабыз биз.

Чанкала, чагъарла деп кюрешмейик,
Игиге, аманга юлешмейик,
Тюз болуп, бир бирге илешейик,-
Дин къарындашлабыз биз.

Тиллени, халкъланы айырмайыкъ,
Къарыусузгъа жалкъа къайырмайыкъ,
Тюз болайыкъ, жарлыгъа къайгъырайыкъ, -
Дин къарындашлабыз биз.

Кевсер суулай болсун ниетибиз,
Ачыкъ болсун дуниягъа бетибиз,
Онг тапсын, тюзелсин миллетибиз, -
Дин къарындашлабыз биз.

Алам тилин Сулайманча билейик,
Ырысхы-бош, огъурлулукъ тилейик.
Дунияны кезиулюгюн билейик,-
Дин къарындашлабыз биз.

Ёксюзлеге къарыу, къанат берейик,
Юйсюзлени хатерлерин кёрейик.
Ассы болмай, даулет бла ёлейик,-
Дин къарындашлабыз биз.